နိုင်ငံတော်ပရိယတ္တိသာသနာ့တက္ကသိုလ်(မန္တလေး) သံဃာတော်များ ဝါဆို ဝါကပ်တော်မူခြင်းနှင့် ဝါဆိုသင်္ကန်း ဆက်ကပ်လှူဒါန်းပွဲအခမ်းအနားကျင်းပ

မန္တလေး၊ ဇူလိုင် ၃၀

နိုင်ငံတော်ပရိယတ္တိသာသနာ့တက္ကသိုလ်(မန္တလေး) သံဃာတော်များ ဝါဆို ဝါကပ်တော်မူခြင်းနှင့် ဝါဆိုသင်္ကန်းဆက်ကပ် လှူဒါန်းပွဲအခမ်းအနားကို ယနေ့ ညနေပိုင်းတွင် နိုင်ငံတော်ပရိယတ္တိသာသနာ့တက္ကသိုလ် (မန္တလေး) ပရိဝုဏ်အတွင်းရှိ မဟာဘွဲ့နှင်းသဘင်ခန်းမ၌ ကျင်းပပြုလုပ်ခဲ့ရာ နိုင်ငံတော်ပရိယတ္တိသာသနာ့တက္ကသိုလ် (မန္တလေး)က ဒုတိယပါမောက္ခချုပ် (စီမံ/ဘဏ္ဍာ) နှင့် ဇနီး တက်ရောက်ကြည်ညိုပြီး ဝါဆိုသင်္ကန်း နှင့်လှူဖွယ်ပစ္စည်းများ ဆက်ကပ်လှူဒါန်းသည်။

အဆိုပါအခမ်းအနားသို့ နိုင်ငံတော်ပရိယတ္တိသာသနာ့တက္ကသိုလ် (မန္တလေး) ပါမောက္ခချုပ် ဆရာတော်အမှူးပြုသည့် သင်ကြား/စီမံဆရာတော်(၆၇)ပါးနှင့် စာသင်သားသံဃာတော် (၂၈၁)ပါး၊ စုစုပေါင်းဝါဆိုသံဃာတော်(၃၄၈)ပါးတို့ ကြွရောက်ချီးမြှင့်တော်မူကြပြီး နိုင်ငံတော်ပရိယတ္တိသာသနာ့တက္ကသိုလ် (မန္တလေး)က ဒုတိယပါမောက္ခချုပ် (စီမံ/ဘဏ္ဍာ) နှင့် ဇနီး၊ နိုင်ငံတော်ပရိယတ္တိသာသနာ့တက္ကသိုလ် (မန္တလေး) အမှုထမ်း၊ အရာထမ်းများနှင့် အလှူရှင်များ တက်ရောက်ကြသည်။

ယင်းနောက် အခမ်းအနားကို နမောတဿသုံးကြိမ်ရွတ်ဆို ဘုရားကန်တော့ဖွင့်လှစ်၍ အခမ်းအနားတက်ရောက်ကြသူများက နိုင်ငံတော်ပရိယတ္တိသာသနာ့တက္ကသိုလ်(မန္တလေး) ပါမောက္ခချုပ်ဆရာတော် ဒေါက်တာဘဒ္ဒန္တကေသရထံမှ ငါးပါးသီလချီးမြှင့်တော်မူခဲ့ပြီး ဆရာတော်ကြီးများ ရွတ်ပွားချီးမြှင့်တော်မူသည့် မေတ္တသုတ်ပရိတ်တရားတော်များကို နာယူ ကြည်ညိုကြသည်။

ဒုတိယပါမောက္ခချုပ် (စီမံ/ဘဏ္ဍာ) နှင့် ဇနီး၊ တို့က ပါမောက္ခချုပ်ဆရာတော်ကြီးထံ ဝါဆိုသင်္ကန်းနှင့် လှူဖွယ်ပစ္စည်းများကို ဆက်ကပ်လှူဒါန်းသည်။ ယင်းနောက် ကြွရောက်လာသော ဆရာတော်၊ သံဃာတော်များထံ ဝါဆိုသင်္ကန်းနှင့် လှူဖွယ်ပစ္စည်းများကို အသီးသီးဆက်ကပ်လှူဒါန်းကြသည်။

နိုင်ငံတော်ပရိယတ္တိသာသနာ့တက္ကသိုလ်(မန္တလေး) မဟာဘွဲ့နှင်းသဘင်ခန်းမ၌ သံဃာတော်များ ဝါဆို ဝါကပ်တော်မူခြင်းနှင့် ဝါဆိုသင်္ကန်းဆက်ကပ်လှူဒါန်းခြင်းအခမ်းအနား မှတ်တမ်းဓာတ်ပုံများ