သာသနာတော်ဆိုင်ရာဘွဲ့တံဆိပ်တော်များ စိစစ်ရွေးချယ်ရာတွင် ဘွဲ့လျှောက်ထားသော ဆရာတော်၊ လူပုဂ္ဂိုလ်များသည် မိမိတို့၏သာသနာရေးဆိုင်ရာဆောင်ရွက်ချက်၊ ထေရုပ္ပတ္တိ၊ ကိုယ်ရေးအကျဉ်း၊ လှူဒါန်း ထားသော အလှူငွေစာရင်းများနှင့် မှန်ကန်ကြောင်း သက်ဆိုင်ရာထောက်ခံချက်၊ သံဃနာယကအဖွဲ့ အဆင့်ဆင့်ထောက်ခံချက်၊ အထွေထွေအုပ်ချုပ်ရေးဦးစီးဌာန၊ ကျေးရွာ၊ ရပ်ကွက်၊ မြို့နယ်၊ ခရိုင်၊ အုပ်ချုပ်ရေးမှူးများ၏ထောက်ခံချက်များ၊ ရဲစခန်းထောက်ခံချက်နှင့်တကွ သတ်မှတ်ရက်အမီ လျှောက်ထားရပြီး တိုင်းဒေသကြီး/ ပြည်နယ်သာသနာရေးမှူးရုံးများက သတ်မှတ်အရည်အချင်းနှင့် ကိုက်ညီသူများအား စိစစ်လက်ခံပါသည်။

သာသနာရေးနှင့်ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီး သူရဦးအောင်ကိုသည် ၁၃-၁-၂၀၁၈ ရက်နေ့၊ နံနက် ၈ နာရီတွင် ရန်ကုန်မြို့၊ ကမ္ဘာအေးကုန်းမြေရှိ မဟာပါသာဏလိုဏ်ဂူသိမ်တော်ကြီး၌ ကျင်းပလျက်ရှိသည့် တိပိဋကဓရ တိပိဋကကောဝိဒ ရွေးချယ်ရေးစာမေးပွဲသို့ ကြွရောက်တော်မူကြသည့် တိပိဋကဓရ တိပိဋကကောဝိဒ ရွေးချယ်ရေးစာမေးပွဲဩဝါဒါစရိယ ဆရာတော်ကြီးများ၊ စာထောက် စာမ ဆရာတော်များနှင့် အာဂုံပြန်သံဃာ​တော်များအား နဝကမ္မဝတ္ထုငွေများ ဆက်ကပ်လှူဒါန်းသည်။

နိုင်ငံတော်သံဃမဟာနာယကအဖွဲ့၊ ဥက္ကဋ္ဌဆရာတော်ကြီးနှင့် နိုင်ငံတော်သံဃမဟာနာယက အဖွဲ့ဆရာတော်ကြီးများအားပုပ်ရဟန်းမင်းကြီး ဦးဆောင်သောကိုယ်စားလှယ်အဖွဲ့က လာရောက် တွေ့ဆုံပြီး အပြန်အလှန်နှုတ်ခွန်းဆက်စကားပြောကြား၍ ကမ္ဘာ့ငြိမ်းချမ်းရေးဆိုင်ရာကိစ္စရပ်များကို အမြင်ချင်းဖလှယ်ကြမည်ဖြစ်ကြောင်း အများပြည်သူသိရှိနိုင်စေရန် အသိပေးဖော်ပြအပ်ပါသည်။

ဖြောင့်မတ်တည်ကြည် အမှောင်ပယ်တိုက် ဘက်မလိုက် သတင်းဂျာနယ် Page ၏ Facebook စာမျက်နှာပေါ်၌ Zay Lin Htike အကောင့်အမည်ဖြင့် မြန်မာ နိုင်ငံရေး ဘက်မလိုက် သတင်း ဟစ်တိုင် တွင် “မနေ့ နေ့လည်ပိုင်းက ပြုလုပ်တဲ့ သာသနာရေးဆိုင်ရာ ဆွေးနွေးပွဲတွင် သာသနာရေးဝန်ကြီး ဦးအောင်ကို က တရားပွဲများတွင် ရွတ်ဆို ကြွေးကြော်လေ့ရှိသော ဗုဒ္ဓသာသနံ စိရံ တိဋ္ဌတု ဆိုသည်မှာ ဗုဒ္ဓသာသနာ အဓွန့်ရှည်ပါစေသော်ဟု အဓိပ္ပါယ်ရကြောင်းနှင့် ၎င်းစကားရပ်မှာ အမျိုးဘာသာ သာသနာစောင့်ရှောက်ရေး အဖွဲ့ မဘသ၏ ရည်ရွယ်ချက်နှင့် ထပ်တူကျနေသဖြင့် မရွတ်ဆိုသင့်ကြောင်း၊ တရားမျှတသော သာသနာ ဖြစ်ဖို့အတွက် အခြားဘာသာ သာသနာကို လေးစားသောအားဖြင့် နောက်နောင် တရားပွဲများတွင် မရွတ်ဆိုဖို့ တိုက်တွန်းပါသော်လည်း အတင်းအကြပ် မလုပ်ပါဘဲ မိမိတို့၏အသိတရားဖြင့် တဖြည်းဖြည်း ပြင်သွားစေလိုကြောင်း ပြောကြားသွားသည်”ဟု မမှန်မကန် ရေးသားဖော်ပြထားသည်ကို တွေ့ရှိရပါသည်။

            အဆိုပါလူမှုကွန်ရက်အင်တာနက် Facebook စာမျက်နှာများတွင် ရေးသားဖော်ပြသည့် အကြောင်းအရာ များသည် သာသနာရေးနှင့်ယဉ်ကျေးမှုဝန်ကြီးဌာန၊ ပြည်ထောင်စုဝန်ကြီးက ပြောကြားခြင်း၊ ဝန်ကြီးဌာနမှ ထုတ်ပြန်ကြေညာခြင်း လုံးဝ(လုံးဝ)မရှိပါကြောင်းနှင့် အများပြည်သူ အထင်အမြင်လွဲမှားစေရန် ဖန်တီး လှုံ့ဆော်နေခြင်းကြောင့် ထိုသို့ရေးသားဖော်ပြသော Facebook Account နှင့် Page များအား ဥပဒေ နှင့်အညီ အရေးယူဆောင်ရွက်သွားမည်ဖြစ်ပါကြောင်း အများပြည်သူသိရှိနိုင်စေရန် ရှင်းလင်းဖော်ပြအပ် ပါသည်။

၂-၈-၂၀၁၇ ရက်နေ့တွင် ရန်ကုန်တိုင်းဒေသကြီး၊ ရွှေတိဂုံစေတီတော် အရှေ့ဘက်မုခ်အနီး မဟာဇေယျ အတုလမာရဇိန် ကြေးသွန်းဘုရားတွင် သံဃာ ၁၀ ပါးနှင့် လူပုဂ္ဂိုလ် ၃၅ ဦးတို့ကလည်းကောင်း၊ မန္တလေး တိုင်းဒေသကြီး၊ ချမ်းမြသာစည်မြို့နယ်၊ မဟာမုနိဘုရားကြီး အနောက်ဘက် ၂၅၀၀ ခန်းမရှေ့တွင် သံဃာ ၁၅ ပါးခန့်နှင့် လူပုဂ္ဂိုလ် ၅၀ ဦးခန့်တို့ကလည်းကောင်း အစိုးရအား ဆန့်ကျင်သပိတ်မှောက်ပွဲ ပြုလုပ်ခဲ့ကြောင်း လူမှုကွန်ရက်အင်တာနက်စာမျက်နှာများတွင် တွေ့ရှိရပါသည်။

ပတ္တနိက္ကုဇ္ဇနကံဆောင်ခြင်း(သို့မဟုတ်) သပိတ်မှောက်ခြင်းဆိုသည်မှာ ရဟန်းကောင်း၊ ရဟန်းမြတ် များအပေါ် အပြစ်လုပ်သူ ဒါယကာ၊ ဒါယိကာမများအား သပိတ်မှောက်သူများက သံဃာနှင့်ပတ်သက်ခွင့် ရှိသူ မဟုတ်တော့ကြောင်း၊ ၎င်းတို့လှူဒါန်းသည့် ဆွမ်း၊ ကွမ်းစသော အလှူဒါနတို့ကို ခံယူမှုမပြုတော့ကြောင်း သိစေအပ်ခြင်းကို ပတ္တနိက္ကုဇ္ဇနကံဆောင်သည်(သို့မဟုတ်) သပိတ်မှောက်သည်ဟု ဆိုလိုခြင်းဖြစ်ပါသည်။